Қаңтар айында «Шымыр» атты толықметражды халықтық экшн-фильмнің түсірілімі басталды. Бұл — Dasco Capital басқаруындағы Tolqyn Film Fund қаржыландырған төртінші киножоба. Фильмнің өндірісімен New Era Films компаниясы айналысады, ал прокатқа шығу күні биылғы жылдың 7 мамырына жоспарланған.
Фильмнің режиссері — қазіргі қазақстандық киноның ең табысты коммерциялық режиссерлерінің бірі Анвар Матжанов. Оның қоржынында «миллиардтық» табысқа жеткен жобалар бар: «Таптым-ау сені» (кассалық түсім — 1,8 млрд теңге), «Брат или брак 3» (1,3 млрд), «Бизнес по-казахски в Индии» (1,3 млрд), «Таптым-ау сені 2» (1,1 млрд), «Бизнес по-казахски в Турции» (1,1 млрд). Сценарий авторлары — әйгілі режиссер әрі сценарист Адильхан Ержанов, сондай-ақ Қуаныш Тоханов пен Айнұр Мубарова.
Жобаға мықты актерлік құрам қосылды. Басты рөлдерде — Еркебұлан Дайыров («№37», «Тәубе», «Қаш»), Азамат Сатыбалды («Бақыт құшағында», «Капитан Байтасов», «Рэкетир 2»), Ақбота Нұр («Соңғы махаббат», «Адал алаяқтар», «Маған назар аудар»), Әбілмансур Серіков («5:32», «Охота на розового зайца», «Дос-Мұқасан»), Олжас Тоғымбет («Бизнесмен», «Ана жүрегі»), Әшім Ахметов (Qaitadan, «Хотя бы кинода», «Қажымұқан»), Елдос Шәйкенов («Қара бекіре», «Дос-Мұқасан»), Алмат Сакатов (Qaitadan, «Қажымұқан») және басқа да актерлер.
«Шымыр» — ұлттық колориті айқын, жекпе-жек хореографиясы ерекше, каскадерлік трюктерге бай, қатал сюжеті бар және әділдік, ерлік, ар-намыс пен адалдық тақырыптарын қозғайтын шынайы экшн-фильм.
Dasco Capital компаниясының CEO-сы Дармен Садвакасовтың айтуынша, «жеке инвестициялар — қазақстандық киноны жүйелі түрде дамытудың маңызды құралы. Tolqyn қоры арқылы біз отандық креативті индустрияға жобаларды іріктеуден бастап қаржылық модельдеуге, продюсерлік және дистрибуциялық тәсілдерге дейінгі үздік халықаралық тәжірибелерді енгіземіз. Жаңа бизнес-модельдер қазақстандық фильмдердің жанрлық аясын кеңейтіп, сапасын арттыруға және контенттің әлеуметтік құндылығын күшейтуге мүмкіндік береді. Ұзақ мерзімді перспективада бұл ел ішінде де, халықаралық деңгейде де бәсекеге қабілетті, тұрақты киноиндустрияны қалыптастырады».
Tolqyn Film Fund CEO-сы Ернар Курмашевтің сөзінше, «біз “Шымыр” жобасынан шынайы аутентикалық кейіпкері бар, әр көрерменге түсінікті месседждерге толы батыл экшн күтеміз. Бұл — қазақстандық кино үшін сирек кездесетін нағыз экшн-аттракцион, онда әлемдегі ең мықты каскадерлердің бірі — ірі голливудтық студиялармен және Netflix-пен жұмыс істейтін Nomad Stunts командасы қатысады. Адильхан Ержанов ойлап тауып, Анвар Матжанов түсіріп жатқан бұл оқиғада энергия, мінез және ащы шындық бар».
Бұған дейін Tolqyn қоры режиссер Алишер Утевтің «Дәстүр: Теріс бата» хоррор-фильміне (25 желтоқсаннан бері прокатта табысты көрсетілуде), Қуаныш Бейсектің «7 қарақшы» экшніне (2026 жылдың сәуіріне жоспарланған) және «Байқа! Алаяқ!» детективтік комедиясына (премьерасы — 2026 жылғы 19 наурыз) инвестиция салған. Фильмдердің дистрибьюторы — Қазақстанда, Орталық Азияда және Закавказьеде жетекші орын алатын Ascar Cinema (Meloman Entertainment) компаниясы.
Tolqyn Film Fund — Қазақстанда толықметражды көркем фильмдер мен анимация өндірісіне инвестиция салатын алғашқы жеке инвестициялық қор. Қор активтері коммерциялық әлеуеті бар қазақстандық және халықаралық киножобалар портфеліне инвестицияланады, мақсат — фильмдерді прокаттау мен дистрибуциялау арқылы пайда табу. Tolqyn Film Fund құрамында киножобаларды мұқият іріктеу, талдау және басқарумен айналысатын тәжірибелі команда жұмыс істейді.
