Tolqyn AI Venture Fund қорының нысаналы көлемі — 50 млн АҚШ доллары. Dasco Capital мен «Бәйтерек» холдингінің еншілес ұйымы QIC стратегиялық ынтымақтастық туралы келісімге қол қойды.
Президент Қасым-Жомарт Тоқаев 2026 жылды Цифрландыру және жасанды интеллект жылы деп жариялаған тұста, Қазақстанда жасанды интеллект пен креативті индустрияларға инвестиция салуға бағытталған Tolqyn AI Venture Fund іске қосылуда. Астана, 2026 жылғы 2 қазан. AI & Digital Bridge 2026 халықаралық технологиялық форумы аясында Dasco Capital мен «Бәйтерек» ұлттық инвестициялық холдингінің еншілес ұйымы Qazaqstan Investment Corporation (QIC) стратегиялық ынтымақтастық туралы келісімге қол қойды. Құжат QIC-тің Tolqyn AI Venture Fund қорына жоспарланған қатысуын көздейді.
Құжатқа QIC басқарма төрағасы Дидар Қарымсақов пен Dasco Capital бас атқарушы директоры Дармен Садвакасов қол қойды.
Нысаналы көлемі 50 млн АҚШ долларын құрайтын Tolqyn AI Venture Fund қоры жасанды интеллект, цифрлық технологиялар және креативті индустриялар тоғысындағы, ауқымын кеңейту әлеуеті бар жобаларға инвестиция салуға бағытталған.
Қор капиталының жартысын Қазақстанға, Орталық Азия мен Кавказ елдеріне, қалған жартысын жаһандық нарықтағы жобаларға бағыттау жоспарланып отыр. Қазақстан қордың өңірлік портфеліндегі негізгі нарық болады. Бұл тәсіл отандық компанияларды қолдауға және сонымен қатар келешегі зор халықаралық жобалардың дамуына қатысуға мүмкіндік береді.
Креативті индустриялардың әлемдік экономикадағы маңызы артып келеді. Олар адами капитал, зияткерлік меншік, технологиялар мен цифрлық өнімдер негізінде жаңа нарықтар қалыптастыруда. БҰҰ-ның Сауда және даму ұйымының (UNCTAD) деректері бойынша, 2024 жылы креативті қызметтердің әлемдік экспорты 1,7 трлн АҚШ долларына жетті. Әлемдік қызметтер саудасының шамамен 20%-ы креативті қызметтерге тиесілі, ал жекелеген елдерде креативті экономиканың ЖІӨ-дегі үлесі 7,3%-ға дейін жетеді.
Қазақстан үшін креативті экономиканы дамыту экономикалық өсімнің жаңа бағыттарын қалыптастыруға, жоғары біліктілікті талап ететін жұмыс орындарын ашуға және кәсіпкерлікті қолдауға мүмкіндік береді. Көптеген цифрлық және креативті компаниялар талант, технологиялар мен зияткерлік меншікке сүйене отырып, қызмет ауқымын кеңейте алады әрі ішкі нарыққа да, халықаралық аудиторияға да арналған өнімдер жасай алады.
Жасанды интеллект осы саланың дамуын одан әрі жеделдетіп, бағдарламалық жасақтама, контент, дизайн, ойындар, медиа және басқа да цифрлық өнімдерді жасау тәсілдерін өзгертуде. Stanford AI Index 2026 есебіне сәйкес, 2025 жылы жасанды интеллектке салынған әлемдік корпоративтік инвестициялар екі еседен астам өсіп, 581,7 млрд АҚШ долларына жетті, ал жеке инвестициялар 127,5%-ға артты.
«QIC-тің Tolqyn AI Venture Fund-қа қатысуы Қазақстандағы креативті және технологиялық кәсіпкерлікті дамытуға қолдау көрсетуге деген ұмтылысымызды көрсетеді. Біз талантқа, білімге, зияткерлік меншікке және технологияларға негізделген индустрияларда айтарлықтай әлеуетті көріп отырмыз. Қазақстандық кәсіпкерлердің идеялары мен құзыреттерін сұранысқа ие өнімдерге және ішкі де, халықаралық та нарықтарда дами алатын тұрақты компанияларға айналдыруға мүмкіндік беретін жағдай жасау маңызды», – деді QIC Басқарма төрағасы.
Халықаралық мысалдар осы сектордағы компаниялар құнының өсу әлеуетін көрсетеді. Reuters деректері бойынша, 2026 жылғы тамызда жасанды интеллект көмегімен контент жасауға арналған Higgsfield платформасы 400 млн АҚШ доллары көлемінде инвестиция тартты. Компанияның бағаланған құны 5,4 млрд АҚШ долларына жетіп, қаңтардағы көрсеткіштен шамамен төрт есе жоғары болды. Қытайлық MiniMax компаниясының нарықтық капиталдандыруы 2026 жылғы қаңтарда Гонконг биржасына алғаш шыққан кезде 10 млрд АҚШ долларынан асты. Бұл мысалдар саланың инвестициялық әлеуетін және портфельдік компанияларды сәтті іріктеп, дамыту арқылы жоғары венчурлік табыстылыққа қол жеткізу мүмкіндігін көрсетеді.
«Бүгінде жасанды интеллект технологиялары фильмдер, анимация және басқа да контент жасау тәсілдерін түбегейлі өзгертіп жатыр. Біз осы саладағы революциялық өзгерістерге куә болып отырмыз. Dasco Capital компаниясы Tolqyn AI Venture Fund қоры арқылы Қазақстанда, Орталық Азияда және жаһандық нарықтарда осы саланың дамуына белсенді қатысуды жоспарлап отыр», – деді Dasco Capital бас атқарушы директоры Дармен Садвакасов.
QIC пен Dasco Capital ынтымақтастығы Қазақстанның венчурлік және креативті экожүйесін дамытуға, келешегі зор жобалардың капиталға қолжетімділігін кеңейтуге және экономикалық өсімнің жаңа көздерін қалыптастыруға бағытталған. QIC қатысуының түпкілікті шарттары қор құжаттамасында бекітіледі.
Анықтама үшін:
«Qazaqstan Investment Corporation» АҚ – 2007 жылы құрылған тікелей инвестициялар қорларының қоры. Оның негізгі миссиясы – тікелей инвестицияларды тарту және негізгі салаларды жаңғыртуға әрі олардың бәсекеге қабілеттілігін арттыруға ықпал ететін жобаларды қолдау арқылы Қазақстанның тұрақты экономикалық өсуіне жәрдемдесу. «Бәйтерек» Ұлттық инвестициялық холдингі» АҚ-ның еншілес ұйымы болып табылады. Қосымша ақпаратты https://qic.kz/ сайтынан алуға болады.
Dasco Capital Ltd – «Астана» халықаралық қаржы орталығында (АХҚО) тіркелген қазақстандық инвестициялық компания. Компания тікелей және венчурлік инвестициялар қорларын, оның ішінде Tolqyn Film Fund OEIC Ltd. қорын басқарады. Қосымша ақпаратты https://dascocapital.kz/ сайтынан алуға болады.
